1Th 2 | AAK | STEP | Gí̵ nɨrɨxí̵meáyí̵ne', seyí̵ne' nɨjí̵árɨnɨ. None seyí̵ne' tí̵ŋí̵ e nɨseaímearí̵ná wáí̵ yopa mɨseamearɨgɨnɨŋwanigɨnɨ.

1 Thessalonians 2

Poro Tesaronaika ŋweáyí̵ tí̵nɨ nɨŋwearí̵ná eŋí̵pɨ nánɨrɨnɨ.

1 Gí̵ nɨrɨxí̵meáyí̵ne', seyí̵ne' nɨjí̵árɨnɨ. None seyí̵ne' tí̵ŋí̵ e nɨseaímearí̵ná wáí̵ yopa mɨseamearɨgɨnɨŋwanigɨnɨ. 2 Sɨnɨ seyí̵ne' tí̵ámɨnɨ mɨseare'meapa nerɨ aŋí̵ Piripaiyo wáí̵ emearí̵ná apimɨ dáŋí̵yí̵ xeanɨŋí̵ neaikárɨro rɨkɨkɨrí̵ó neairo egí̵ápɨ nánɨ seyí̵ne' rɨxa nɨjí̵árɨnɨ. E neaikárí̵agí̵a aiwɨ e pí̵nɨ nɨwiárɨmɨ seyí̵ne' tí̵ámɨnɨ nɨbɨrí̵ná ámá obaxí̵ pí̵rɨpí̵rí̵ neaianɨro yarɨŋagí̵a aí Gorɨxo dɨŋí̵ sɨxí̵ neamímóí̵pimɨ dánɨ masɨsí̵á bɨ mɨneainí̵ xwɨyí̵á yayí̵ neainarɨŋí̵pɨ xɨxenɨ nɨseara uŋwanigɨnɨ. 3 Ámá xwɨyí̵á yayí̵ neainarɨŋí̵pɨ dɨŋí̵ oɨkwí̵rópoyɨnɨrɨ nurɨrane'ná nepa mimónɨŋí̵pimɨ dánɨ wí urarɨŋwámanɨ. Nɨpɨkwɨnɨ mimónɨŋí̵pɨ owikáraneyɨnɨrɨ wí urarɨŋwámanɨ. Yapí̵ owíwapɨyaneyɨnɨrɨ urarɨŋwámanɨ. 4 E mepa nerane Gorɨxo “Porowa mɨmɨwiároarɨgí̵áwarí̵anɨ?” nɨyaiwirɨ xwɨyí̵á yayí̵ neainarɨŋí̵pɨ wáí̵ uraní̵wá nánɨ dɨŋí̵ neaŋwɨrárɨŋí̵ eŋagɨ nánɨ xí̵o rí̵í̵rɨxɨnɨrɨ wimónɨŋí̵pɨ tí̵nɨ xɨxenɨ axí̵pɨnɨ urarɨŋwárɨnɨ. Ámá wí nene nánɨ yayí̵ owiní̵poyɨnɨrɨ urarɨgí̵ápa none axí̵pɨ e wí murí̵ Gorɨxo —Negí̵ xwioxí̵yo adadí̵ neaiarɨŋo, ayí̵ orɨnɨ. O none nánɨ yayí̵ owinɨnɨrɨ negí̵ rarɨŋwápɨ ámáyo urarɨŋwárɨnɨ. 5 Seyí̵ne' nɨjí̵árɨnɨ. None seyí̵ne' tí̵ŋí̵ e nɨseaímearí̵ná rɨxɨŋí̵ remeaní̵ wí mɨsearɨŋwanigɨnɨ. Rɨpɨ nánɨ enɨ Gorɨxo sopɨŋí̵ neaopaxí̵ imónɨnɨ. Í̵wí̵ searápanɨrane nánɨ dɨŋí̵ ínɨmɨ nɨkwí̵rómáná nɨremeá xwɨyí̵á bɨ mɨsearɨŋwanigɨnɨ. 6 None Kiraisoyá wáí̵ wurɨmeiarɨŋwáone imónɨŋagwɨ nánɨ ananɨ oneaiípoyɨnɨrɨ searɨpaxí̵ imónɨŋagwɨ aí seyí̵ne'ranɨ, ámá wíranɨ, seáyɨ e oneamearí̵poyɨnɨrɨ wí enɨ meŋwanigɨnɨ. 7 None seyí̵ne' tí̵nɨ nɨŋwearane'ná nɨpenɨmáná awayinɨ nɨseairane apɨxí̵ sɨnɨ niaíwí̵ pí̵ó tí̵ŋí xegí̵ niaíwí̵yo dɨŋí̵ nɨŋwɨrárɨrɨ umearɨŋí̵pa axí̵pɨ e seaiŋwanigɨnɨ. 8 None dɨŋí̵ sɨxí̵ nɨseayirane nánɨ “Xwɨyí̵á yayí̵ neainarɨŋí̵ Gorɨxo tí̵ámɨnɨ imónɨŋí̵pɨ áwaŋí̵ ouraneyɨ.” nɨneaimónɨrí̵ná dɨŋí̵ arí̵á nikeamónɨmáná seyí̵ne' nánɨ aga íkí̵nɨŋí̵ sɨpí neaiarɨŋagɨ nánɨ yoí̵ mayí̵ nimónɨmɨ seyí̵ne' tí̵ámɨnɨ emeŋwanigɨnɨ. 9 Gí̵ nɨrɨxí̵meáyí̵ne', “Omɨŋí̵ none seyí̵ne' tí̵nɨ nɨŋwearane'ná anɨŋí̵ miní̵ rí̵á tí̵ŋí̵ eŋwápɨ nánɨ sɨnɨ dɨŋí̵ seainarɨnɨ.” nimónarɨnɨ. Xwɨyí̵á Gorɨxoyá yayí̵ neainarɨŋí̵pɨ wáí̵ nɨsearɨrane'ná aiwá none nanɨ nánɨ anɨŋí̵ seaikáranɨgɨnɨrɨ árí̵wɨyiranɨ, ikwáwɨyiranɨ, rí̵wí̵ nɨrí̵kwínɨmáná omɨŋí̵ we' tí̵nɨ íníná yagwárɨnɨ. 10 None Kiraisomɨ dɨŋí̵ wɨkwí̵roarɨgí̵áyí̵ne' tí̵nɨ nɨŋwearane'ná sɨyikwí̵ mínɨŋí̵pɨnɨ erane we' rónɨŋí̵pɨnɨ erane xwɨyí̵á mɨneaxekwí̵mopaxí̵ imónɨŋí̵pɨ erane eŋwápɨ nánɨ seyí̵ne' sopɨŋí̵ neaopaxí̵yí̵ne'rɨnɨ. Gorɨxo enɨ sopɨŋí̵ neaopaxí̵ imónɨnɨ. 11 None xanowa wigí̵ niaíwí̵yo píránɨŋí̵ umearɨgí̵ápánɨŋí̵ axí̵pɨ e seamearɨŋwápɨ nánɨ seyí̵ne' nɨjí̵árɨnɨ. Woxɨnɨ woxɨnɨ e nɨseamerane'ná wairɨrí̵ seairane eŋí̵ rɨre'mɨxí̵ seairane dɨŋí̵ sɨxí̵ seamímorane eŋwárɨnɨ. 12 Seyí̵ne' ámá Gorɨxoyá —O ámá xí̵oyá xwioxí̵yo ŋweapí̵rí̵áyo seáyɨ e xí̵o imónɨŋí̵pɨ bɨ ouxí̵meáwɨnɨgɨnɨrɨ we'yo í̵á seaumɨrarɨŋorɨnɨ. Oyá ámá píránɨŋí̵ nɨxí̵dɨróná epaxí̵pɨ seyí̵ne' apɨ tí̵nɨ xɨxenɨ e'í̵rɨxɨnɨrɨ apɨ apɨ e seaiŋwanigɨnɨ.

13 Rɨpɨ nánɨ enɨ íníná Gorɨxomɨ yayí̵ wiarɨŋwárɨnɨ. None nɨbɨrane xwɨyí̵á Gorɨxoyápɨ yaŋí̵ seaiapáná seyí̵ne' xɨxenɨ arí̵á nɨneairóná xwɨyí̵á ámáoneyá bí̵nɨŋí̵ arí̵á mɨneainí̵ xwɨyí̵á nepaxɨŋí̵ imónɨŋí̵pí̵nɨŋí̵ arí̵á neaigí̵awixɨnɨ. Xwɨyí̵á apɨ —Apɨ Kiraisomɨ dɨŋí̵ wɨkwí̵rogí̵áyí̵ne' dɨŋí̵ seaimoarɨŋí̵pɨrɨnɨ. Apɨ nepa xwɨyí̵á oyápɨ eŋagɨ nánɨ arí̵á e neaigí̵awixɨnɨ. 14 Gí̵ nɨrɨxí̵meáyí̵ne', ámá Kiraisɨ Jisaso tí̵nɨ ikárɨnɨgí̵á, sɨyikí̵ Gorɨxoyá Judia pɨropenɨsí̵yo imónɨgí̵áyo wímeaŋí̵pa seyí̵ne' enɨ rɨxa seaímeaŋɨnigɨnɨ. Wigí̵ Judayí̵ xeanɨŋí̵ wikárɨgí̵ápa seyí̵ne' enɨ segí̵ gwí̵ axí̵yí̵ xeanɨŋí̵ seaikárɨgí̵awixɨnɨ. 15 Gí̵ Judayí̵ wí̵á rókiamoagí̵áwamɨ nɨpɨkía nɨwagí̵asáná Ámɨná Jisasomɨ pɨkiro none enɨ mɨxí̵ neaxí̵dowárɨro egí̵áyí̵rɨnɨ. Ayí̵ ámá Gorɨxo yayí̵ winarɨŋí̵yí̵ rimónɨŋoɨ? Aga oweoɨ. Ámá nɨyonɨ sí̵mí̵ tí̵nɨ wiarɨgí̵áyí̵rɨnɨ. 16 None xwɨyí̵á e'máyí̵ arí̵á nɨwiro dɨŋí̵ wɨkwí̵róáná Gorɨxo yeáyí̵ uyimɨxemeaní̵ápɨ wáí̵ murɨmepa oe'poyɨnɨrɨ pí̵rɨpí̵rí̵ neaianɨro yarɨgí̵áyí̵rɨnɨ. E nerɨŋí̵pimɨ dánɨ wigí̵ í̵wí̵ pákí̵kí̵ ne'ra u'í̵ápɨ rɨxa yurí̵nowiarɨnɨ. Ayɨnánɨ Gorɨxo rɨxa wikí̵ nɨwónɨrɨ ayo pɨrí̵ umamoarɨnɨ.

Poro ámɨ sɨŋwí̵ wɨnɨmɨnɨrɨ nánɨ wimónɨŋí̵ nánɨrɨnɨ.

17 Gí̵ nɨrɨxí̵meáyí̵ne', none ayí̵ yapɨ wí mimónɨŋwɨnɨ. None segí̵ tí̵ŋí̵ e dánɨ mɨxí̵ neaxí̵dowáráná negí̵pɨ ámɨ wí e bɨ onɨmiápɨ nɨŋweámáná —Íná none sɨnɨ sí̵mɨmaŋí̵yo sɨŋwí̵ mɨseanɨpa nerane aí dɨŋí̵ arí̵á wí mɨseaikeamoŋwanigɨnɨ. Ámɨ wí e negí̵pɨ bɨ onɨmiápɨ nɨŋweámáná ámɨ seyí̵ne' tí̵nɨ oŋweaaneyɨnɨrɨ aga íkí̵nɨŋí̵ sɨpí nɨneairɨ e yanɨ nánɨ sí̵mí̵ xeadí̵pe'nɨŋwanigɨnɨ. 18 Awau' tí̵nɨ Poronɨ tí̵nɨ —Nionɨ ayí̵ ná bɨnɨ marí̵áɨ. None segí̵ tí̵ámɨnɨ “Obaneyɨ.” neaimóní̵agɨ aí Seteno pí̵rí̵ nearakiŋɨnigɨnɨ. 19 Ayí̵ rɨpɨ nánɨ segí̵ tí̵ámɨnɨ “Obaneyɨ.” neaimónɨŋɨnigɨnɨ. Gorɨxo none yayí̵ neaimoní̵a nánɨ imónɨgí̵áyí̵, ayí̵ seyí̵ne' menɨranɨ? Dɨŋí̵ nií̵á neainɨní̵a nánɨ imónɨgí̵áyí̵, ayí̵ seyí̵ne' menɨranɨ? “Ná tiyí̵ rɨmeáwɨnɨ?” yaiwianí̵wá nánɨ imónɨgí̵áyí̵, ayí̵ seyí̵ne' menɨranɨ? Jisaso ámɨ báná oyá sɨŋwí̵ anɨŋe dánɨ none igigí̵ bɨ me' seyí̵ne' wáí̵ nɨsearɨrane'ná nánɨŋí̵ eŋwápɨ nánɨ raní̵wárɨnɨ. 20 None seáyɨ e nimónɨrane dɨŋí̵ nií̵á neainɨní̵ápɨ, ayí̵ seyí̵ne' eŋagɨ nánɨ rarɨŋɨnɨ.